السلام عليكم ورحمة الله وبركاته
أسعد الله أوقاتكم بكل خير .. جبت لكم موقع أمريكي مميز جداً Rue Lala يعرض تخفيضات لأشهر الماركات العالمية تصل بعضها إلى 70% وهو موثوق جداً جداً ، كان قديماً ما يقبل إلا الفيزا الأمريكية لكن من كم سنة صار يقبل غيرها ..
الموقع عباره عن بوتيكات للعديد من الماركات المعروفة يُعرض في كل بوتيك البضاعة المخفضه وقد تختلف نسبة الخصم بين بعضها في البوتيك الواحد.. أحياناً يكون الخصم فيها مبهر وأحياناً يكون بسيط جداً، تنتهي بعض المعروضات في فترة قصيره فإذا أردت شراء شيء منها لازم يكون قرارك سريع..
الشحن مباشر عن طريق Borderfree وهي شركة شحن تقدم خدمة التسوق المباشر للعديد من المواقع المتعاقده معها -يعني مو شركة وسيطة أو تجميع مثل myus وغيره- وتقوم هي بالشحن عن طريق ارامكس او dhl او غيرها (يوجد قائمة للمتاجر اللي يتعاملون معها في موقعهم)..
اذا كانت الطلبات من بوتيك واحد يشحنونها مع بعض أما اذا كانت من بوتيكات مختلفه يفصلونها عن بعض مثل تجربتي هذي وصلتني وحده لحالها ومن بكره وصلت الثانيه..
جربت الشراء من الموقع كم مره أعرض لكم آخرها كان فيها عرض توصيل مجاني للطلبات فوق 100$ اشتريت مظلة من ميسوني، جميلة وجودته عاليه
ونظارات شمسية من برادا، كانت مخاطره اني اشتري بدون لا أشوف هي تناسب رسمة وجهي ولا ما تناسب، اخذت رقم الموديل وبحثت بالصور كثير لين ما لقيت صورة لوحده لابستها وجهها نفس رسمة وجهي، توكلت على الله وشريتها وطلعت مناسبة..
جاتني علبه النظارة فيها أثر صبخة مع الجنب داخله على جوا شوي، مع انه العلبه من النوع المتين والقوي، ما أدري هو كذا من قبل ما يشحنونه ولا من شركة التوصيل، لكن المهم انه النظاره جوا سليمة ..
تقييمي العام للموقع 10/9 ممتاز جداً، -1 بسبب انه بعض الاشياء ما تشحن خارج امريكا
اتمنى اكون افدتكم… شاكره لوقتكم
تجربتي فاشله مع هالموقع شريت ١٦٠ دك ليما الحين ماوصلني شئ والفيزا الي استخدمتها لعمليه الشراء حاولو يسحبون منها خمس مرات لمنتج انا دفعته مسبقاً واليوم تكررت نفس القصه الحمدالله ان بطاقتي تعبئه تواصلت معاهم ايميلات ماكو رد ما انصح ابدا بهذا الموقع حاليا راح اسوى عمليه مطالبه واحتيال ديرو بالكم
إعجابإعجاب
RuLaLaبصراحة مصدومة اول مرة اشتري ذهب اون لاين واشتريت تعليقة ذهب وغامرت والتعليقة شكلها وردة وفيها حبات الماس وكبيرة شوي حجمها وسعرها كلفني مع الشحن الفين ومية وشي والمهم توصلني تعليقة شكل ثاني صغيرة الحجم جداً وغير الي طلبتها وارسل لهم ايميلات ولايردون علي وطريقتهم من قبل في التواصل والابلاغ عن الشحنة مرة مايتواصلون على عكس موقع فرافيتج زعلانه بس حمد ربي ما اشتريت اكثر ذهب
إعجابإعجاب
اهلاً سمر ..
تؤسفني تجربتك معاهم .. جربي تتواصلين معهم لايف شات أحسن ..
كنت اشوف القطع اللي عندهم وتعجبني الأشكال بس استفتيت بحكم شراء الذهب اون لاين وقالوا ما يجوز لأن الرسول صلى الله عليه وسلم قال: “يداً بيد” ..
حبيت انبهك على هذي النقطه .. موفقه
إعجابإعجاب